Partizani do të presë ditën e diel në ‘Selman Stermasi”, vlonjatët e Flamurtarit në kuadër të javës së tetë të Superiores. Një përballje mjaft interesante pasi të dy ekipet ndodhen në vendin e 3 dhe 4, me një pikë diferencë mes tyre. Edhe për Gerhard Prognin nuk është një sfidë e lehtë, por Partizanin nuk e kënaq në asnjë rezultat tjetër veç fitores. Pas një starti negativ “të kuqtë” janë kthyer tek fitoret dhe Progni kërkon të vazhdojnë me ecurinë pozitive.
“Kemi vuajtur në javët e para, por jemi kthyer tek fitoret. Të gjitha ekipet janë të forta dhe duhet të vlerësohen maksimalisht. Flamurtari është një ekip mjaft i rrezikshëm në fazën sulmuese dhe do kërkojë fitoren në “Selman Stermasi”. Por ne jemi në një moment mjaft të mirë dhe nuk do të pranonim asnjë rezultat vec fitores. Personalisht do të kem mjaft punë me Alvesh dhe Busic, por jam duke e përgatitur mjaft mirë ndeshjen.”
Progni foli për rolin e trajnerit Iuliano dhe kohët kur ka qenë futbollist i Flamurtarit. Lojtari ka treguar se fillimi ishte i vështirë për të gjithë, pasi kështu ndodh në çdo ekip që ndryshon pothuajse në të gjitha repartet lojtarë dhe stafin drejtues.
“Nuk jemi i vetmi ekip që e nisim kampionatin dobët, pas ardhjes së shumë lojtarëve të rinj, ata donin kohë që të ambientoheshin dhe të jepnin atë që priteshe. Edhe stafi drejtues ishte i ri dhe me eksperiencën e parë në kampionatin shqiptarë, pasi i duheshe pak kohë për të kuptuar filozofinë që ka ky kampionat. Tani jemi në rrugën e duhur dhe çdo gjë po shkon drejt normaliteti, po rritemi fizikisht dhe teknikisht dita ditës. Unë kamë qenë për tre vite lojtarë i Flamurtarit dhe atje kemi bërë mirë në çdo kampionat, na ka munguar vetëm titulli kampion dhe për këtë më vjen shumë keq”, është shprehur Progni.
