Arta Marku, 41-vjeçarja do të jetë tashmë prokurorja e përkohshme, ajo që do të zëvendësoje kryeprokurorin Adriatik Llalla. Arta Marku u diplomua në shkollën e magjistraturës në vitin 2001.
Një vit më pas u emërua në Prokurorinë e Shkodrës ku mbajti detyra të ndryshme, që nga shefe e njësisë task forcë në 2006 e deri zëvendës drejtuese deri në 2016.
Marku e ka nisur karrierën e saj në kohën kur kryeprokuror në Shkodër ishte Ulsi Manja, ndërkohë që prej 16 vitesh dosjet e hetuara prej saj dhe të përfaqësuara në Gjykatë kanë qenë fare të pakta.
Një ndër to është dosja ndaj pedagogut Fran Qafa, i cili më pas mori pafajësinë në Gjykatë. Në fakt për numrin e pakët të dosjeve të hetuara, zonja Marku u pyet edhe nga anëtarët e Komisionit të Ligjeve, të cilëve iu përgjigj se ajo kishte firmosur mjaft dosje të hetuara prej kolegëve dhe të përcjella në Gjykatë.
Me 69 vota pro dy kundër dhe dy abstenim, deputetet e mazhorancës votuan Arta Markun në detyrën e Prokurores së Përgjithshme të përkohshme.
Seanca plenare është zhvilluar në një situatë të tensionuar si brenda edhe jashtë sallës së Kuvendit. Deputetët e opozitës kanë hedhur brenda në sallë tymues, duke krijuar një situatë kaotike. Megjithatë kjo nuk e ka penguar kreun e Kuvendit, Gramoz Ruçi që të vijojë me votimin e projektligjeve.
“Hapet votimi, votimi i fshehtë, vazhdon votimi…69 vota pro, 2 kundër, 2 abstenim”, tha Gramoz Ruçi.
Menjëherë pas votimit, Kryetari i Grupit Parlamentar të PS-së, Taulant Balla kërkoi që “të gjitha votimet e tjera të shtyhen për seancën pasardhëse. Të shtyhet votimi për Autoritetin e Mbikëqyrjes Financiare dhe për komisionin e prokurimit publik.”
Gramoz Ruçi: Atëherë 20 minuta pushim, të thirret zonja Marku për të bërë betimin.
Pritet që Marku të bëjë betimin e saj para Kuvendit, ndërsa seanca është ndërprerë disa herë që nga nisja e saj.
Komisioni i Ligjeve zgjodhi 3 nga 7 kandidatët që u vetëofruan për pozicionin e Kryeprokurorit të përkohshëm, por socialistët mbështetën Arta Markun dhe jo atë të Ferdinand Elezit dhe Ermira Tafanit.
Zgjedhja e Kryeprokurorit të përkohshëm kundërshtohet ashpër nga opozita e bashkuar.
