Kryetari i Partisë Bindja Demokratike, Astrit Patozi ka komentuar ardhjen e 7.020 dozave të vaksinës nga Pfizer, ku kryeministri Edi Rama shkoi te aeroporti Nënë Tereza, për të ndjekur procesin e transportimit të tyre.
Patozi e quan spektakël të shëmtuar”, dhe thotë se nuk është nevoja për kaq shumë temenara”.
Patozi shprehet se bëhet fjalë vetëm për një grusht dozash dhe aspak për sasinë që ka nevojë vendi për t’u çliruar nga ankthi i Covid 19.
Postimi i Patozit në rrjetin social, Facebook
BOLL ME KËTË SPEKTAKËL TË SHËMTUAR!
Po boll, mor burrë, me këtë butaforinë e pritjes në aeroport të vaksinave, se e bëre baltë fare!
Edhe ushtarë që ktheheshin nga lufta të ishin, nuk do të kishte qenë nevoja për kaq shumë temenara, që shkëlqejnë nga hipokrizia dhe përdorimi politik për fushatë.
Dhe të mendosh që bëhet fjalë vetëm për një grusht dozash dhe aspak për sasinë që ka nevojë vendi për t’u çliruar nga ankthi i Covid 19.
