Ministrja e Drejtësisë Etilda Gjonaj ka sqaruar aktin normativ të firmosur për të burgosurit që do të lirohen, për tre muaj për shkak të koronavirusit.
Gjonaj ka deklaruar se tashmë pritet të lënë qelinë rreth 600 të burgosur ndërsa për të siguruar shëndetin e tyre janë ndaluar takimet me familjarët.
“Takimi i të dënuarve me familjarët të pezulluara plotësisht deri sa kjo situatë të stabilizohet janë zëvendësuar me komunikime online me qëllim mbrojtjen e shëndetit të tyre dhe të familjarëve.
Janë marrë masa për krijimin e infrastrukturës mjekësore të posaçme për trajtimin e rasteve të dyshuara. Fatmirësisht nuk kemi pasur asnjë rast deri tani.
Por duke parë çfarë ka ndodhur në vende të tjera jemi përgatitur për shëndetin të burgosurve.
Ministria e Drejtësisë kreu një analizë të detajuar të situatës shëndetësore në sistemin e burgjeve dhe vendosi që të lirojë për një periudhë tre mujore të gjithë të dënuarit që nuk përbëjnë rrezikshmëri të lartë.
Të gjithë të dënuarit që përfitojnë daljen duhet t’i nënshtrohen rregullave ligjore strikte. Parashikohet të lënë burgun rreth 600 të dënuar”, tha Gjonaj.
