Socialistët propozojnë 67 emra për Kreun e Shtetit. Në total vetëm 67 prej tyre janë seleksionuar nga grupi negociator, për t’u diskutuar më tej mes vetë mazhorancës, grupeve të tjera parlamentare dhe shoqërisë civile. Kryeministri Edi Rama nuk e ka përjashtuar mundësinë që ata të dalin në raundet e para me më shumë se 1 kandidaturë.
Në mbledhjen e djeshme që u mbajt në Kryesinë e Kuvendit, të drejtën e votës e kishin dhe ministrat që nuk kanë një mandat deputeti.
Në fjalën e tij kryeministri Edi Rama tha se fokusi i socialistëve është që të gjejnë një president normal, në ndryshim nga Ilir Meta që sipas tij, është më skandalozi që Shqipëria ka pasur.
Dje, kryetari i përkohshëm i Partisë Demokratike, Enkelejd Alibeaj bëri thirrje që procesi i zgjedhjes së drejtuesit të ri të shtetit shqiptar të jetë transparent dhe të përfshijë të gjitha palët politike dhe jo-politike. Ai sulmoi procesin konsultativ brenda mazhorancës për zgjedhjen e Presidentit të ri me zarfe si jo serioz, ndërsa theksoi se nëse Kreu i ri i Shtetit do të zgjidhet me shumicë minimale në raundin e katërt apo të pestë nga PS, do të jetë diçka groteske dhe qesharake.
“Është më i rëndësishëm procesi, pasi nëse është gjithëpërfshirës dhe transparent, jo i mbyllur në zarfe, do japë produktin e duhur. Ky duhet të jetë frymëzimi dhe qasja. Për këtë arsye të gjithë e dimë se cila është procedura e zgjedhjes së Presidentit. Presidenti në raundin e parë dhe të dytë nuk ka pse të zgjidhjet me zarf, pasi nuk e shikon dinjitoze. Dhe zgjedhja e tij në raundin e 4 dhe të 5 nuk duhet të ndodhë, kjo e bën groteske dhe jo serioze”, u shpreh Alibeaj.
