Ish-kryetari i LSI-së, tashmë president, ka futur në sherr anëtarë të partisë së vogël opozitare.
Ditën e sotme, ish-ministri i Drejtësisë Ylli Manjani doli publikisht kundër Metës, teksa tha se ky i fundit gaboi me letrën që i dërgoi presidentit amerikan Donald Trump lidhur me çështjen e votimit në Organizatën e Kombeve të Bashkuara.
Në një reagim në Faceboook, Manjani shkroi se kjo letër ishte “e gabuar sa më s’ka”, teksa shprehet se kryetari ynë i shteti i ankohet kryetarit të një shteti tjetër, për shtetin e tij që nuk ekziston fare.
Ish-ministri gjykon më tej se letra nuk duhej të ishte shkruar, pasi sipas tij “Kushtetuta super konsensuale që miratuan vjet e fshiu fare edhe atë pak shtet që kishte mbetur tek Presidenti i Republikës”, duke përmbyllur se Presidenti është nxituar me atë letër, pasi duhej ta kishte analizuar më parë sjelljen e pushtetit, se është i lexueshëm!
Kjo ka sjellë reagimin e kreut të grupit parlamentar të LSI-së, Petrit Vasili, i cili i ka dalë në mbrojtje Metës, sigurisht në mënyrë jo të drejtpërdrejtë, ndërsa kundërshton Manjanin:
“Asnjë shqiptar nuk është në krah të qeverisë kur ajo voton kundër Amerikës. Arsyet e errëta të këtij votimi antiamerikan të qeverisë janë të qarta dhe qellimkëqia. Çdo avokati e këtij turpi që nuk zhbëhet dot është po aq e errët sa edhe vetë arsyet e errëta të qeverisë kapur për të votuar haptas kundër Amerikës.”
