Presidenti Ilir Meta mblodhi paraditen e sotme Këshillin e Lartë të Drejtësisë, ku u diskutua çështja e gjyqtares së vrarë Fildez Hafizi dhe gruas nga Fieri që u hodh nga dritarja nga bashkëshorti, Liljana Ruko.
Në mbledhje kanë munguar tre anëtarë të KLD-së. Mësohet se gjyqtarët që munguan janë Albana Shtylla, Sokol Çomo dhe Brunilda Kadi.
Kjo, pasi Albana Shtylla dhe Sokol Çomo janë dorëhequr për shkak se janë bërë pjesë e organeve të vettingut, ndërsa Brunilda Kadi mungon pasi merr pjesë në një seminar jashtë shtetit.
Pas mbledhjes së KLD, Meta deklaroi për mediet:
Mbledhja përfundoi me një kohë të shpejtë, që do të thotë se vullneti për bashkëpunim, për të plotësuar të gjitha detyrimet që ka ky institucion deri në krijimin e institucioneve të reja kushtetuese është maksimal dhe në kuadër të përshpejtimit të zbatimit të reformës në drejtësi dhe sidomos të zbatimit të ligjit të Vetting-ut, por njëkohësisht edhe në drejtim të përballimit të sfidave që ka funksionimi aktual i sistemit gjyqësor, që natyrisht ka vështirësitë e veta drejt kalimit në një sistem plotësisht të ri.
Z. Meta, cilat ishin shqetësimet e KLD-së në lidhje me pikën e parë të rendit të ditës që ka lidhje me Vetting-un?
Unë besoj se këto do të bëhen publike, sepse diskutimet në KLD-së bëhen publike, por natyrisht që ky është një proces plot sfida dhe vullneti është maksimal për të bashkëpunuar me institucionet e reja të Vetting-ut, por edhe me EURALIUS dhe OPDAT-in që asistojnë në këtë proces.
