Gjyqtarja Vitore Tusha konfirmohet si kandidatura zyrtare e Presidentit Ilir Meta në krye të Kontrollit të Lartë të Shtetit. Ashtu si kishte njoftuar më parë Tirana Today, Tusha është personi që me shumë mundësi do të zëvendësojë Bujar Leskaj në krye të KLSH-së
https://tiranatoday.com/ekskluzive-zbardhet-emri-ja-kush-do-jete-ne-krye-te-klsh-se/
Lajmi është konfirmuar dhe nga Presidenca në një njoftim zyrtarë të publikuar për median. Bashkangjitur njoftimit është dhe një CV e zonjës Tusha.
Por, kush është Vitore Tusha?
Tusha është diplomuar në vitin 1983 në Fakultetin e Drejtësisë në Universitetin e Tiranës. Nga viti 1983 deri në vitin 1990 ajo ka punuar si përmbaruese gjyqësore në Tiranë dhe prej 1990 deri në 1992 si avokate. Në periudhën 1992-1994, Tusha ka ushtruar detyrën e gjyqtares në Gjykatën e Tiranës dhe në vitet 1994-2001 atë të gjyqtares në Gjykatën e Kasacionit – ku nga viti 1999 deri në vitin 2001 ka udhëhequr kolegjin civil të kësaj gjykate.
Nga viti 1986 e në vazhdim ka qenë lektore e së Drejtës Civile dhe Procedurës Civile pranë Fakultetit të Drejtësisë në Universitetin e Tiranës dhe Shkollës së Magjistraturës. Ne vitin 2008 ajo u zgjodh gjyqtare në Gjykatën Kushtetuese.
Presidenca njoftoi në tetor hapjen e procesit për kandidatë për Kryetar të Kontrollit të Lartë të Shtetit, në përfundim të mandatit 7-vjeçar të kreut të KLSH-së, Bujar Leskaj.
Afati i paraqitjes së shprehjes së interesit shoqëruar me dokumentacionin e nevojshëm, ka qenë nga data 12 tetor 2018 deri më datë 30 tetor 2018.
