Kryetari i Partisë Republikane, Fatmir Mediu, ka mbajtur të njëjtën linjë si kryetari i PDIU-së, Shpëtim Idrizi, sa i takon zgjedhjes së Presidentit të ri. Pas takimit me kreun e grupit parlamentar të PS-së, Taulant Balla, Mediu ka hedhur poshtë propozimin e Enkelejd Alibeajt që kandidati i ri mos të jetë pjesë e politikës. Sipas Mediut, është absurde që politika të përjashtojë politikën. Sakaq, kujtojmë këtu se Shpëtim Idrizi i PDIU-së tha se ka ardhur momenti kur procesi për zgjedhjen e Presidentit të ri të Republikës të hyjë në fazën e emrave konkretë. Në një deklaratë për gazetarët jashtë Kryesisë së Kuvendit pas takimit me përfaqësuesit e mazhorancës, Idrizi u shpreh se të gjitha palët duhet të arrijnë konsensus dhe Presidenti të zgjidhet jo vetëm me votat e mazhorancës.
“Si “Aleancë për Ndryshim” kemi vendosur që propozimet do t’i bëjmë brenda opozitës. Jashtë opozitës asnjë qëndrim. Unë nuk i ndaj as të “Rithemelimit”, apo ç’a emri i vini ju. Të gjithë deputetët duhet të marrin pjesë me një kandidat të përbashkët.
Kam folur dje edhe me Bylykbashin, Boçin, Alibeajn, kolegët e grupit “Aleanca për Ndryshim” dhe ky ka qenë qëndrimi ynë, duhet të kemi një qëndrim të përbashkët për kandidat dhe më pas t’ja paraqesim mazhorancës.
Siç e shikoj, nuk do ketë kandidat ditën e hënë. Është absurde që politika të përjashtojë politikën, por besoj që nuk mund ta ngushtojmë në një profil të caktuar. Duhet të jemi të gjerë në fusha të ndryshme. Qëndrimi ynë ishte që ne do të kemi një dakordësi me opozitën, për të shkuar të dakordësia me mazhorancën”, tha Mediu.
