Kryeministri Edi Rama ka takuar në Bruksel edhe presidentin e KE-së, Jean-Claude Juncer, ku në qendër të bisedave ka qenë hapja e negociatave për Shqipërinë me Bashkimin Evropian.
Gjatë një konference të përbashkët, Juncer shprehet se Shqipëria i ka përmbushur kërkesat, e për këtë arsye ai tha se është në favor të Shqipërisë për çeljen e negociatave.
Sa i përket ngërçit që ka kapur zhvillimin e zgjedhjeve vendore, presidenti i KE-së theksoi se njerëzit nuk mund të privohen nga e drejta e tyre për të votuar, ndërsa shtoi se shtyrja e këtyre zgjedhjeve, do të ndikojnë në perspektivën Evropiane të vendit.
“Autoritetet shqiptare kanë plotësuar kërkesat. Nëse i kërkojmë një vendi të bëjë këtë apo atë dhe ai i plotëson nuk kemi si i themi ‘JO’. Unë jam në favor për hapjen e negociatave, pasi Shqipëria ka plotësuar kërkesat, por nuk është sekret se disa vende kanë disa shqetësime.
E kam siguruar kryeministrin se do të mbrojë çdo vijë dhe deklaratë të raportit tonë. Lufta kundër kanabisit është një shembull. Rëndësia e unitetit politik, të gjitha partitë duhet të angazhohen në mënyrë konstruktive në institucionet demokratike. Zgjedhjet janë parashikuar për në fund të qershorit. Jam aq i interesuar që Shqipëria të ketë progres.
Njerëzit nuk mund të ndalohen. Këto zgjedhje duhet të mbahen nëse jo do të shtynin perspektivën Evropiane të Shqipërisë. Kështu që jam i lumtur që të dëgjoj kryeministrin. Jam në favor për hapjen e negociatave në verë apo fillim të vjeshtës”, deklaroi Jean-Claude Juncer.
