Presidenti i Republikës Çeke, Millosh Zeman, kërkoi falje për bombardimet e NATO-s në ish-Jugosllavi, në vitin 1999, teksa ditën e sotme priti në Pragë homolugun e tij serb, Aleksandër Vuçiç.
”Ishte një gabim, më keq se një krim. Si njeri, unë do të doja të kërkoja nga populli serb që të na falë. Më ka torturuar gjatë gjithë kohës. Me këtë lutje për falje, unë zgjidh traumën time afatgjatë sepse pendimi çliron,” u tha Zeman gazetarëve pasi u takua me Vuçiç.
Vuçiç tha se, nga ky moment, populli serb do t’i konsiderojë çekët “jo vetëm si popull mik, por edhe si popull vëllazëror”, shkruan N1.
Ai shtoi se Serbia dhe populli i saj nuk do t’i harronin kurrë “ato fjalë”, dhe se Zeman ishte zyrtari i parë që kishte thënë diçka të tillë. Vuçiç më pas u tha gazetarëve se të dy diskutuan marrëdhëniet ekonomike dhe përmirësimin e tyre.
Para takimit, Zeman dhe Vuçiç shkëmbyen dekorata. Vuçiç mori Urdhrin e Luanit të Bardhë, ndërsa Zeman u dekorua me Urdhrin e Republikës së Serbisë.
