Presidenti i Republikës, Ilir Meta do të niset me urgjencë drejt Kavajës, pas të shtënave me armë zjarri në këtë qytet, ku mbeti i plagosur sekretari i PD në një zyrë elektorale.
Lajmin e ka bërë të ditur zëdhënësi i tij, Tedi Blushi i cili informoi se aktualisht Kreu i Shtetit ndodhet në Elbasan, në një iftar të organizuar nën kujdesin e Tij, me klerikët lokalë të pesë komuniteteve fetare.
Blushi u shpreh se Meta kërkon që qytetarët e Kavajës të mos provokohen dhe të ruajnë qetësinë.
Njoftimi nga Zëdhënësi i Presidencës, Tedi Blushi
Presidenti i Republikës, Sh.T.Z Ilir Meta po e ndjek me shumë shqetësim situatën në Kavajë.
Për shkak se aktualisht, Kreu i Shtetit ndodhet në Elbasan, në një iftar të organizuar nën kujdesin e Tij, me klerikët lokalë të pesë komuniteteve fetare, ku janë të ftuar edhe personalitete të nderuara të qytetarisë elbasanase, si dhe për shkak të një interviste të planifikuar më herët në TV “Skampa”, bëj me dije se menjëherë pas saj, Presidenti Meta do të niset urgjentisht drejt Kavajës.
Kreu i Shtetit i fton qytetarët e Kavajës të mos provokohen dhe të ruajnë qetësinë në këto ditë të fundit para Referendumit të Ndryshimit të Madh të 25 Prillit.
