Kryeministri i Kosovës, Avdullah Hoti, ndodhet në izolim prej 9 ditësh tashmë, që kur rezultoi pozitiv me koronavirus.
Lidhur me gjendjen e tij shëndetësore, ka folur së fundmi këshilltari i tij për media, Xhavit Beqiri.
Në një prononcim për Express, Beqiri thotë se gjendja e Hotit është e mirë, teksa njofton edhe takimet virtuale që ka zhvilluar sot ai.
“Mirë është siç e keni parë tërë ditën e ka pas aktive me takime virtuale nga banesa e tij. Ka pas më herët takim me krerët e sigurisë, po ashtu ka pas takim me kryetarët e komunave dhe drejtorët e departamenteve komunale për shëndetësi, masnej një takim tjetër me kryetarët e komunave dhe drejtorët komunalë për arsim. Në këto dy takime kanë qenë të pranishëm edhe dy ministrat përkatës, ku është diskutuar për opsionet për fillimin e vitit shkollor”, tha këshilltari.
Beqiri thekson se përveç kollës dhe lodhjes, Hoti nuk ka shfaqur asnjë simptomë tjetër.
“Ai do të kalojë atë 14 ditëshin, pra do t’i përmbahet protokollit, masnej kur të del negativ do t’i kthehet punës. Kemi biseduar vazhdimisht dhe nuk ka simptoma të tjera, pak një lodhje të lehtë, por përveç kollës nuk ka ndonjë simptomë tjetër. Këto ditët e fundit sidomos sot e ka pas plot me angazhime”, shtoi ai.
