Pas dy ditësh me një tendencë në ulje të numrit të viktimave nga koronavirus, Italia jep sërish lajmin e keq.
Mediat italiane bëjnë me dije se gjatë 24 orëve të fundit janë shënuar 743 viktima. Ndërkohë janë shtuar 5,249 raste të reja duke e çuar në 54030 numrin total të rasteve aktive.
Deri më tani në Itali janë shëruar 8,326 pacientë nga koronavirusi, 408 prej të cilëve vetëm në 24 orët e fundit. Ndërsa 3,393 persona ndodhen në gjendje kritike për jetën.
Dy ditët e fundit kishte një rënie të viktimave ku dje ishte 601, por sot është regjistruar dita e dytë më e keqe me 743 viktima.
Koronavirusi i ka marrë jetën 6,820 personave në Itali, shifra më e lartë kjo në të gjithë botën. Shtetet tjera më të prekura nga koronavirusi janë Spanja, Kina, Irani, Koreja e Jugut etj.
Më shumë se 18 mijë persona nga e gjithë bota kanë humbur jetën nga Covid-19. Ky virus ka regjistruar deri më tani më shumë se 400 mijë raste infektimi në rang global, teksa 104,714 pacientë kanë arritur të shërohen.
