Prej 8 vitesh “Mjeshtër i Madh”, Jorgo Papingji ende nuk e ka marrë pensionin që i takon. I ftuar në një intervistë në ‘Vizioni i Pasdites’, Papingji ka ende shumë pikëpyetje se ku shkon pensioni i veçantë që i takon atij prej 8 vitesh që nga marrja e titullit. Ai madje gjatë intervistës thotë se kjo gjë i ka ngelur peng. Gjatë këtyre viteve, ende nuk ka dalë vendimi që ai të marë pensionin e veçantë.
“Unë nuk e kam kuptuar asnjëherë pse më ka ngelur peng. Ka lidhje me vlerësimin e punës sime, jo me vlerësimin formal se i kam marrë të gjitha, çmime, vlerësime, letra, fleta nderi, fleta lavdërimi.
Nuk e kam kuptuar asnjëherë, kam tetë vite që kam marrë titullin “Mjeshtër i Madh”, dhe gjatë këtyre tetë viteve nuk ka dalë ende vendimi që unë të marr pensionin e veçantë.
Unë nuk e di dhe nuk besoj që jepet pas vdekjes. Në një moshë që jam unë, do ta kisha marrë atë pensionin. Nuk e di arsyen, cila është mënyra e vlerësimit, kush e pengon këtë gjë!
Dua të them që më jepet apo nuk më jepet pensioni i veçantë, unë pensionin e marr në çdo takim me njerëzit, në çdo tavolinë që rri me njerëzit, në çdo rrugë që kaloj, me mijëra përshëndetje nga njerëzit e thjeshtë dhe të natyrshëm edhe nganjëherë ku bie rasti ju them që nuk e kam marrë pensionin, më thonë: “ Ti se ke marrë pensionin! Si ka mundësi..”, përfundoi Papingji.
Jorgo Papingji i ka drejtuar një lutje gjithë atyre që mund të jenë në dijeni të kësaj procedure.
“ I lutem atij që e ka në dorë këtë punë, të më thotë çfarë duhet të bëj unë tjetër akoma, për të arritur të marr pensionin”, është shprehur mes emocioneve “Mjeshtri i Madh” i muzikës.
