Kreu i grupit parlamentar të LSI-së, Petrit Vasili ka reaguar ashpër lidhur me projektbuxhetin 2018.
Teksa anëtarët e LSI-së braktisën Konferencën e Kryetarëve, Vasili tha se opozita nuk mund të ishte pjesë e këtij shqyrtimi, ndërsa paraqiti edhe dokumentin për projektbuxhetin të pafirmosur nga kryeministri Rama, duke e akuzuar atë dhe qeverinë e tij se janë të kapur nga krimi.
“Siç çdo qytetar e di, dokumenti më i rëndësishëm që një qeveri apo kryeministër paraqet para vendit është pikërisht ligji i buxhetit të shtetit.
Opozita nuk mund të vazhdojë të jetë pjesë në këtë shqyrtim, veç arsyeve politike e madhore pasi ky shtet është i kapur dhe i bërë njësh me trafikun, por edhe për arsyen themelore se kjo qeveri nuk ka të bëjë me interesat e qytetarëve.
Nuk i kam parë kurrë më qesharakë kolegët e rilindjes. Këtë dokument kryeministri as nuk ka begenisur ta firmosë. Ky dokument flet qartë, nuk keni parë gjë, kur ai bojkoton dokumentin e qeverisë ë tij, ne nuk mund t’i bëjmë fresk atij që s’ka kohë të firmosë, pse s’e merr seriozisht? Ky dokument nuk është i kryeministrit tuaj, nuk ka pasur kohë ta firmosë.
Ky dokument nuk është i kryeministrit tuaj. Ai nuk di gjë fare ça është shkruar. Ditë e zezë për vendin kur kryeministri nuk mendon për popullin”, tha Vasili.
