Ish-ministri Besnik Mustafaj tha sot se politikanët po përpiqen të ndryshojnë kushtetutën që të mbrojnë vetveten nga arrestimet. I ftuar në rubrikën “Opinion” në “News24”, Mustafaj deklaroi se “qartësimi” i rregullave dhe procedurave për arrestimin e deputetëve është për të kufizuar impaktin e drejtësisë. Mustafaj sqaron se shpjegimet nga ana e iniciatorëve të këtyre ndryshimeve janë të paqarta dhe dyshimta.
“Rregullorja e Kuvendit ka ndryshuar në mënyrë sistematike gjatë viteve. Kanë qenë mazhorancat ato që kanë ndërmarrë nisma të tilla. Kjo është një praktikë me të cilët parlamentarët janë mësuar, dhe opinioni publik nuk i ka marrë shumë në konsideratë. Por siç thuhet kërkesa e PS vjen pas seancave dëgjimore për Saimir Tahirin, dhe diçka e tillë cilësohet si tentative për të kufizuar impaktin e drejtësisë. Shpjegimet nga ana e iniciatorëve të këtyre ndryshimeve janë të paqarta dhe dyshimta,” deklaroi Mustafai.
Ish-ministri quan fajtorë të këtyre veprimeve si mazhorancën dhe opozitën. Ai tha se duhet të shpjegohet më qartë propozimi i mazhoranës, dhe po kështu edhe opozita duhet të sqarojë pse është kundër.
“As opozita nuk i ka shpjeguar në mënyrë të qartë se çfarë të keqe ka realisht ndryshimi i Rregullores,” tha ai.
Mustafaj u ka dhënë dhe një këshillë ligjvënësve të sotëm se çfarë duhet të bëjnë më projet propozimet e tyre për ndryshimet kushtetuese.
“Si një parlamentar i vjetër do të thoja se nga momenti që këto ndryshime janë të paragjykuara dhe nuk janë të nevojshme këto dyshime mazhoranca duhet t’i ndërpresë dhe t’i lërë për një moment më të qetë”, u shpreh Mustafaj.
Sa i takon ngritjes së komisioneve të reformës në drejtësi, KLP dhe KLGJ, Mustafaj tha se mosbesimi ndaj këtyre struktura e dëmton procesin.
“Akuzat e ndërsjellë nga ana e politikës edhe në procese të tilla që i bëjnë duke punuar bashkë, opozitë-mazhorancë, krijojnë një mosbesim në publik për reformën në drejtësi. Kjo krijon klimën e mosbesimit. Por duhet të themi se reforma në drejtësi e ka jetike besueshmërinë e opinionit publik. Nëse ne krijojmë një reformë që nuk gëzon besimin e opinionit publik nuk do të jetë e qenë”, tha Besnik Mustafaj.
