Ish-presidenti Alfred Moisiu, teksa komentoi situatën politike në vend, paralajmëroi se një parti politike do të shkërmoqet.
I ftuar në “News24”, Moisiu deklaroi se më e rrezikuar është opozita jo parlamentare, ndërsa e konsideroi djegien e mandateve një gabim dhe një përbuzje e popullit.
“Kompletimi i Parlamentit mund të çojë në krijimin e një force të katërt politike. Një forcë politike do neutralizohet përfundimisht, do shkërmoqet dhe do krijohet një forcë e re. Shkërmoqje te partitë e opozitës? Po sigurisht. Edhe mazhoranca do ketë pasojat e saja. Ky është një tërmet politik dhe ky do ketë pasoja në të dy krahët, por për opozitën do të ketë më shumë, sepse ata bënë një gabim me djegien e mandateve. Mandatin ta jep populli për të ushtruar të drejtën e tij. Kjo është sjellje shumë negative ndaj popullit, është përbuzje e popullit”, tha Moisiu.
Ndër të tjera, ish-presidenti nënvizoi se Shqipëria duhet të marrë përgjigje pozitive në tetor për hapjen e negociatave me BE-në, pasi në të kundërt, populli duhet të ngrihet e t’i bëjë zap këta politikanë.
“Them se do të hapen, ndryshe populli duhet të ngrihet e t’i bëjë zap këta politikanë”, u shpreh Moisiu.
