Nga Mirgen Pero
Që në mëngjes, sapo hap telefonin një lumë portalesh të bombardojnë me fjalën PPP. Shifra marramandese, 200 milionë euro për këtë gjë, 30 milion euro atë gjë, 15 milion euro këtej, 70 milionë euro andej.
Pas habisë së ditëve të para për shifra të tilla, besoj se sot për çdo shqiptar është në kuadrin e “normales” që të dëgjosh dhënie koncesione me vlera të tilla (s’po i quaj më marramendëse). Ashtu siç është bërë normale që të tilla PPP ti asociojmë me vjedhje, zhvatje, dhe kurrsesi me vlerë dhe investim për popullin.
Ku ndodhet e vërteta? S’besoj se ka njeri që sot di ta ndajë, që këto janë fryrje masive vlerash projektesh, apo janë thjesht akuza për të rritur kredon politike të personave të caktuar.
Sa herë dëgjojmë një analist që akuzon për abuzim me PPP, përballë tij kërcen një analist tjetër po aq i njohur sa ky i pari, që e kundërshton që e ka gabim. Sa herë shohim një akuzë që filan politikan është i lidhur me korrupsionin, krimin apo mafian, shohim një fistek politikan i që del në mbrojtje të këtij të parit. Sa herë shohim një iks (x) politikan që përbetohet për pastërti, del edhe një ypsylon (y) i tillë që shtrëngon duar politikanësh të huaj me emra të gjatë, dhe që premtojnë e premtojnë e premtojnë.
Në epokën e portaleve dhe televizionit, në epokën e informimit dhe fake news, internetit dhe propagandës, të gjithë hasim në të njëjtin problem dhe kemi të njëjtën pyetje. Cila është e verteta dhe kur do mbarojë vjedhja e popullit?
Në mes gjithë pjatave luksoze të së vërtetës që na serviren nëpër “restorantet mediatike”, unë kam të vërtetën time. Të vërtetën e “groshës”. Që ne jemi peng i një grupi njerëzish, që në 30 vitet e fundit e marrin popullin me “PPP” dhe e punojnë çdo 8 vjet, sipas rastit, shtresë pas shtrese, lëkurë pas lëkure, deri në palcë!
Është e vështirë të përkufizosh termin “PPP”. Unë jam në dilemë ndërmjet, Peng i Partive Politike, Pranojmë Politikanë të Papërgjegjëshëm apo Punojmë për Politikanë të Pangopur. Populli mund të ketë edhe njëmijë përkufizime të tjera.
E që gjithë këtë kakofoni shifrash, lajmesh, informacionesh, thashethemesh e premtimesh, shqiptari i thjeshtë ngelet po njësoj: Pranë sofrës i pangrënë, pranë dijes i panxënë, pranë lumit i palarë, pranë Evropës “shpellar”!
