Për një politikan serb, Shkodra është një qytet serb. Bëhet fjalë për politikanin serb i cili jeton në Mal të Zi, Vladislav Dajkoviç, i cili ka provokuar rëndë me foto nga qyteti i Shkodrës. Me anë të një postimi në rrjetet sociale, Shkodrën ai e konsideron qytet serb. Madje me krenari thotë se Shkodrën e ka çliruar stërgjyshi i tij, dhe se nuk e harron historinë ku është i lidhur ngushtësisht për shkak të traditës familjare.
“Sot kam vizituar qytetin antik serb Shkodra, në Shqipëri. Për këtë qytet më lidh tradita familjare, sepse Esad Pasha ia ka dorëzuar çelësat e qytetit gjatë çlirimit malazez të Shkodrës.
Si stërnip i Luke Shutovog Dajkoviç, gjithmonë ndjehem bukur në këtë qytet, por gjithashtu me trishtim kur kujtoj mësimin e këngëve serbe, si: “Zidanja Skadra na Bojani” (ndërtimi i Shkodrës në Bunë) në letërsinë tonë.
Nuk e harrojmë historinë tonë, as me çmimin e jetës. Le të rrojë populli ynë, kudo që është”, ka shkruar ai.
