Duket se situata kriminale po njeh shtrirje të madhe në vend, ku nuk mungojnë edhe atentatet e tipit mafioz. Gazetari investigativ Artan Hoxha, i ftuar në studion e “Provokacija”, ka zbuluar se në Shqipëri krimi nuk e komandon politikën, por kjo e fundit e përdor.
Hoxha thekson se që nga viti 2004, bota e krimit është në proces reformimi. Ai tha se në këto grupe kriminale, nuk bëhet fjalë për drejtues.
“Për fat të mirë, ende krimi në Shqipëri nuk e komandon politikën. Tek ne janë politikanët që ende e urdhërojnë dhe përdorin krimin. Në provinca, drejtues të policisë, të kadastrës vendosen nga krimi. Në Vlorë është rasti tipik. U bë marrëveshje mes palëve. Shteti u dorëzua. Rasti tjetër që dëshmon këtë siç ndodhi në Jalë.
Pas 2004, më rezulton se jemi para një reforme që krimi po e bën vetë. Aty nuk ka Vetting fallso. Atje nuk ka gjykata administrative. Aty kanë ca piketa. Nëse e keni vënë re, është rritur numri i vrasjeve të tipit mafioz. Edhe pse policia ka pasur së fundmi sukses.
Ata duken shumë më përpara se autoritetet dhe kjo mua më tmerron. Shqiptarët janë bërë të rëndësishëm në mediat botërore vitet e fundit, kur u fut kokaina dhe ne shkuam në Amerikën Latine.
Shqiptarët njihen shumë të guximshëm. Kemi një të keqe shumë të madhe, nuk krijojmë dot kartel.
Ne nuk kemi ende kokë, grupet tona janë të shpërndara, kanë drejtim horizontal. Në Shqipëri nuk ka vrasje, kur grupet kanë bërë marrëveshje. Ato njihen si kohë të arta, bizneset shkojnë mirë, është lënë dakord me autoritetet”, u shpreh gazetari.
