Policia e Tiranës po e mban “gojën” të mbyllur, për të dhënë detaje në lidhje me sulmin me armë ndaj shtëpisë së prindërve të gazetares Klodiana Lala, duke shmangur kështu kritikat, me faktin se s’mund të jepen të dhënat për shkaqe hetimi.
Burime zyrtare citojnë se për të hedhur dritë mbi këtë ngjarje, është ngritur një grup i posaçëm hetimor, me ekspertë të Drejtorisë së Përgjithshme të Policisë së Shtetit, të Drejtorisë Vendore të Policisë Tiranë, nën drejtimin e Prokurorisë së Rrethit Gjyqësor Tiranë.
Po kështu, nga ana e grupit hetimor janë kryer veprimet procedurale në vendin e ngjarjes, si dhe janë kryer një sërë veprimesh me metoda speciale të hetimit, për të bërë të mundur zbardhjen e ngjarjes, identifikimin dhe kapjen e autorëve.
https://tiranatoday.com/largim-nga-shqiperia-pas-sulmit-me-arme-ja-cfare-thote-bashkeshorti-i-gazetares/
“Në lidhje me veprimet e kryera për ngjarjen e ndodhur në orët e para të mëngjesit të datës 30 Gusht 2018, ku është qëlluar me armë zjarri në drejtim të banesës së shtetasit Arif Lala, i ati i gazetares Klodiana Lala, informojmë se:
Në datë 30 gusht 2018, rreth orës 06.40 minuta, Policia e Tiranës u njoftua se në rrugën “Shkëndija”, fshati Bruk, Tiranë, persona të paidentifikuar kanë qëlluar me armë zjarri në drejtim të banesës së shtetasit Arif Lala.
Ngjarja ka ndodhur rreth orës 03:00 të mëngjesit. Për pasojë është dëmtuar fasada ballore, dhe dera hyrëse e banesës. Në momentin e sulmit, në banesë ishin prindërit e gazetares, vëllai, dy fëmijët e gazetares dhe dy miq të afërm të familjes. Personat brenda banesës nuk kanë pësuar dëmtime.
Në lidhje me këtë ngjarje, menjëherë është ngritur një grup i posaçëm hetimor, me ekspertë të Drejtorisë së Përgjithshme të Policisë së Shtetit, të Drejtorisë Vendore të Policisë Tiranë, nën drejtimin e Prokurorisë së Rrethit Gjyqësor Tiranë.
Nga ana e grupit hetimor janë kryer veprimet procedurale në vendin e ngjarjes, si dhe janë kryer një sërë veprimesh me metoda speciale të hetimit, për të bërë të mundur zbardhjen e ngjarjes, identifikimin dhe kapjen e autorëve.
Grupi hetimor po vijon me intensitet maksimal veprimet hetimore dhe procedurale, por për arsye hetimi nuk mund të bëjmë me dije të dhëna të tjera”, përfundon deklarata zyrtare e policisë.
Prej ditës së djeshme, policia ka marrë në mbrojtje familjen e gazetares investigative. Në orët e para të mëngjesit të 30 gushtit, banesa e prindërve të gazetares në “News 24” ra pre e një sulmi me breshëri automatiku, të tipit mafioz.
Vetë gazetarja përmes një postimi në Facebook tha se sulmi ishte për shkak të detyrës së saj.
