Pas rastit të efektives që iu këputën gishtat, policia është vënë në veprim, për të hequr nga qarkullimi kapsollet. Policia e Tiranës bën me dije se ka ndërmarrë një plan masash për kontrollin e dyqaneve dhe tregjeve që tregtojnë apo shesin lëndë plasëse. Dy dyqane tregtonin lëndët plasëse jashtë kushteve.
“Konstatohen dy subjekte (dyqane) që mbanin dhe tregtonin lëndë piroteknike në mospërputhje me kushtet dhe kriteret për mënyrën e magazinimit dhe përdorimit të lëndëve piroteknike.
Sekuestrohen produkte piroteknike. Policia e Tiranës, në zbatim të planit të masave për kontrollin e dyqaneve dhe tregjeve që tregtojnë apo shesin lëndë plasëse e piroteknike, ka ushtruar kontrolle në dyqanet dhe tregjet e qarkut Tiranë.
Gjatë kontrolleve janë konstatuar në shkelje dy subjekte (dyqane) dhe materialet janë referuar pranë Prokurorisë së Rrethit Gjyqësor Tiranë, për shkeljen e konstatuar në ngarkim të pronarëve të këtyre subjekteve, shtetasve:
– Xh. Rr., 58 vjeç, banues në Tiranë.
Në dyqanin e tij në rrugën “Hamdi Pepo”, ky shtetas mbante dhe tregtonte produkte piroteknike në mospërputhje me kushtet, dhe kriteret për mënyrën e magazinimit dhe përdorimit të lëndëve piroteknike.
– D. K., 44 vjeç, banues në Tiranë.
Në dyqanin e tij në rrugën “Çamëria”, ky shtetas mbante dhe tregtonte produkte piroteknike në mospërputhje me kushtet dhe kriteret për mënyrën e magazinimit dhe përdorimit të lëndëve piroteknike.
Janë sekuestruar në cilësinë e provës materiale produkte piroteknike”, përfundon policia.
