Ish-kryeministri Sali Berisha e konsideron nul njoftimin që Policia e Shtetit ka bërë dje, që nuk e lejon organizimin e protestës më 6 dhjetor në Bulevardin e Tiranës, sepse cënohet siguria kombëtare. Berisha tha se atë ditë do ta mbushë Bulevardin si kurrë më parë.
Në shkresën e saj, policia thekson se protesta brenda perimetrit të sigurisë të caktuar për mbarëvajtjen e samitit BE-Ballkani Perëndimor që mbahet në Tiranë në të njëjtën datë, mund të përbëjë kërcënim për sigurinë kombëtare. Berisha thotë se refuzimi është nul, i paqenë, dhe se tregon fytyrën e vërtetë të regjimit që është i tmerruar që në datë 6 dhjetor do mbushë Bulevardin si kurrë më parë.
“Policia njoftoi dje se mbrëmë se nuk njeh Kushtetutën dhe ligjet e vendit. Lidhur me ketë njoftim i rikujtoj këtyre vasalëve të Edi Ramës se Kushtetua nuk njeh kufizimin për protesta dhe liritë e qytetarëve. Ka një vendim të GJK në të cilin ajo thotë se protestuesit nuk kanë asnjë detyrim t’i drejtohet dhe njoftojë policinë. Së treti, policia, ose Edi Rama po e trajton samitin e liderëve të BE sikur këtu të mblidheshin të gjithë diktatorët e botës, në një kohë kur të gjithë ata që vijnë në Tiranë janë shtetarë të zgjedhur me votën e lirë të qytetarëve.
Ai refuzim është nul, i paqenë, tregon fytyrën e vërtetë të regjimit që është i tmerruar që në datë 6 dhjetor do mbushë Bulevardin si kurrë më parë. Do vërshojnë të gjithë at që ëndrrën evropiane e kanë ëndrrën më kryesore për të ardhmen e tyre. Në datën 6 do të vërshojnë në rrugët e Tiranës të gjithë ata që shohin vlerat europiane si vlerat më të çmuara”, tha Berisha.
