Një ngjarje e rëndë ka ndodhur në Korçë pas mesditës së sotme. Mësohet se një person është masakruar në mes të qytetit, pasi është goditur me sopatë në kokë. Ai ka gjetur vdekjen e menjëhershme për shkak të plagëve të shkaktuara. Sipas raportimeve fillestare viktima është identifikuar si Dashnor Osmani, banues në Pocestë.
Forcat e policisë kanë ndaluar edhe personin e dyshuar si autori i ngjarjes makabre. Sipas raportimeve fillestare ai është identifikuar me inicialet Z.T, 42 vjeç.
Njoftimi i policisë:
Më datë 28.01.2020, në lagjen nr. 9, në Korçë, pas një konflikti për motive të dobëta shtetasi Z. T., 42 vjeç, banues në fshatin Pocestë, dyshohet se ka goditur me mjet prerës shtetasin D. O., rreth 50 vjeç, banues në fshatin Pocestë, i cili për pasojë ka ndërruar jetë.
Shërbimet e Policisë kanë reaguar menjëherë ku kanë kapur autorin e dyshuar, të cilin e kanë shoqëruar në ambientet e Policisë për veprime të mëtejshme.
Grupi hetimor po punon për të sqaruar rrethanat e ngjarjes.
