Kryeministri Edi Rama në një takim informues me gazetarët në lidhje me protestën e dhunshme të zhvilluar në Rrugën e Kombit, i pyetur nga gazetarët se nëse është prezantuar në kontratë që nëse Rruga e Kombit dëmtohet nga protesta do të paguhet nga buxheti i shtetit, Rama u shpreh: Në kontratë nuk parashikohet nëse çohet një grup vandalësh dhe i vë zjarrin dhe do ta paguajë shteti. Do mbrojmë investimet publike dhe private kur këto investime sulmohen nga vandal, sigurisht që kush i ka bërë investimet i kërkon përsëri nga shteti. Nuk ka nevojë të parashikohet në kontratë. Kontrata është për shoqëritë e civilizuara.
Gazetari: Është një video ku një oficer policie godet një qytetar i cili nuk reagon fare. Si e komentoni këtë?
Kryeministri Rama: Vetëm ju mund të bëni pyetje të tilla se përgjigja është e qartë. Në radhë të parë dihet se ka një zonë të përcaktuar për protestë, kush e shkel, është në shkelje të ligjit. Në ato kushte që ishin dje policia ka bërë më të mirën e mundshme, duke ruajtur gjakftohtësinë, përballë një tufe vandalësh,që natyrisht do të marrin ndëshkimin që meritojnë.
Sakaq, Rama justifikoi çdo veprim të policëve, pasi sipas tij qytetarët u sollën si një grup vandalësh dhe që ishin plotësisht në kundërshtim me ligjin.
