Ish-kryeministri i Kosovës, Ramush Haradinaj, ka reaguar ashpër kundër Albin Kurtit dhe e akuzon për shkelje të Kushtetutës. Këtu i referohet rastit të vdekjes së 26 vjeçarit në Qendrën e Studentëve. Haradinaj shigjeton drejpërdrejtë Kurtin, ministrin Arben Vitia dhe ministrin Xhelal Sveçla.
Sipas tij, ata kanë shkaktuar pasoja në shumë drejtime, deri edhe në humbjen e jetës së një të riu. Po kështu, Ministri në detyrë i Shëndetësisë, Arben Vitia, ka thënë se e ka menduar dorëheqjen pas rastit të vdekjes së 26 vjeçarit. Në një konferencë për media, ai u shpreh se si ministër i Shëndetësisë, ka përgjegjësi për zbardhjen e plotë të rrethanave.
Statusi
Të nderuar qytetarë,
Kushtetuta dhe ligjet e aplikueshme të Kosovës janë në fuqi që të ruajnë rendin kushtetues, jetën dhe të drejtat e njeriut. Shkelja recidiviste e Kushtetutës dhe ligjeve në fuqi nga Kryeministri në largim, Albin Kurti, Ministri në largim Arben Vitia dhe U.D i Ministrit në largim Xhelal Sveçla, fatkeqësisht shkaktuan pasoja në shumë drejtime deri edhe në humbjen e jetës së një të riu.
Qeveria në largim, me qasje të njëanshme dhe autoritare shpërfilli vendimet e Gjykatës Kushtetuese, shpërfilli ligjet dhe protokollet për ofrim të ndihmës të domosdoshme shëndëtesore.
I bëj thirrje Qeverisë në largim që të kthehet në kushtetutshmëri e respektim të ligjeve që të ruhet rendi kushtetues, ligjshmëria dhe jeta e qytetarëve të vendit.
