Kryeministri Edi Rama ka deklaruar se shërbimi i transportit publik do të kërkojë të paktën edhe disa javë për t’u hapur.
Në një komunikim me qytetarët në Facebook, Rama theksoi se qeveria po punon për një strategji, që sipas tij do të jetë reformë në transportin publik.
Kreu i qeverisë tha se brenda muajit maj do të ketë një hapje të rrugëve, për shqiptarët që duan të kthehen në vend.
Sipas kryeministrit, turizmi këtë vit do të jetë i shqiptarëve.
“Ju e dini si janë kushtet në fugona dhe autobusë është si të vendosësh autobusë dhe fugonë në dispozicion të virusit. Po punojmë për një strategji, që është edhe një reformë në transportin publik. Durim se ende nuk jemi aty, është problem i madh.
Evropa ka thënë se do të hapet në 15 qershor, disa vende do i hapin më shpejt, ne duam që brenda majit të hapim rrugët për shqiptarët, kam parasysh të Shqipërisë, të Kosovës dhe kudo që jetojnë edhe në funksion të turizmit. Turizmi këtë vit do të jetë i shqiptarëve. Po të sillen pak, jo shumë si suedezë që të zbatojnë ato rregulla që i dini.
Unë i pari dua të jemi, por është përgjegjësi për të balancuar hapjen graduale me mbrojtjen. Brenda majit ne do i hapim më në fund kufijtë për shqiptarët që duan të vijnë në Shqipëri. Më vjen shumë mirë që është realizuar zotimi, që e pra nuk do të gjobiten ata që ishin me 90 ditë në Greqi, mund të ketë ndonjë rast sporadik, dhe e dyta tanimë autobusët e punonjësve sezonalë në Greqi kanë filluar të shkojnë. Puna e tyre nuk është goditur”, tha ai.
