Presidenti rus, Vladimir Putin deklaroi se të dyja vaksinat ruse kundër koronavirusit janë të sigurta dhe efektive.
Ai informoi se një vaksinë e tretë po përgatitet dhe ka shpresën se vaksinimi masiv i popullatës do të fillojë në fund të vitit.
“Kryesorja është se këto vaksina ishin të sigurta dhe efektive. “Të dyja këto kërkesa janë përmbushur në rastin e parë dhe në të dytën dhe vaksina e tretë është duke u përgatitur,” tha presidenti rus.
Putini gjithashtu tha se vaksinat ruse do të ofroheshin për shitje në tregjet e huaja dhe tashmë janë propozuar, por theksoi se vaksinimi i qytetarëve rusë do të ishte një përparësi.
Sipas vlerësimeve të ekspertëve, qarkullimi vjetor nga lëshimi i vaksinës në tregjet ndërkombëtare vlerësohet në rreth 100 miliardë dollarë.
Putin u shpreh se Rusia është e gatshme të shesë të drejtat e prodhimit të vaksinave kompanive të huaja, por jo në kurriz të vaksinimit në vetë Rusinë.
Presidenti tha se ka disa probleme me prodhimin e vaksinës, duke theksuar se për momentin çështja është që të sigurohet vëllimi i nevojshëm i prodhimit industrial.
