U bë një kohë e gjatë që policia po monitoron të gjitha bizneset, nëse ushtrojnë aktivitetin e tyre në kundërshtim me ligjin. Një situatë qesharake ka ndodhur në qytetin e Shkodrës. Menaxherja e një lokali, ka tentuar që t’u mbyll derën policëve, pasi në ato momente po organizohej një dasmë, në kundërshtim me aktin Normativ.
Ndaj biznesit është vendosur gjobë 1 mln lekë, si dhe është vënë në hetim menaxherja 25-vjeçare me inicialet E. N. Ndaj saj rëndojnë akuzat për veprat penale “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të policisë së rendit publik”.
Dasmat nuk janë ndalur as në qytetin e Korçës dhe Pogradecit, ku janë gjobitur pronarë e administratorë.
“Në Korçë, janë konstatuar konkretisht: Subjekti lokal në lagjen nr. 1, në pronësi të shtetasit R. K; Subjekti restorant përgjatë rrugës nacionale Korçë-Bilisht (km 6) në pronësi të shtetasit R. T; Subjekti restorant në rrugën nacionale Korçë-Bilisht (km 5) në pronësi të shtetasve S. F., dhe F. F;
Në Pogradec, u konstatua subjekti në lagjen nr. 2, në pronësi të shtetasit G. K., të katërta duke zhvilluar ceremoni festive në kundërshtim me Aktin Normativ, duke mos respektuar protokollet e sigurisë”, njofton policia.
