Prej disa javësh, Shqipëria ka pësuar një ulje të ndjeshme të numrit të viktimave dhe të infektuarve nga koronavirusi, ndihmuar kjo edhe nga procesi masiv i vaksinimit.
Këtë fakt e ka konfirmuar edhe Shefja e Departamentit të Epidemiologjisë pranë ISHP-së, Silva Bino, e cila është shprehur se situata epidemiologjike paraqitet e qëndrueshme, për shkak edhe të uljes së pozitivitetit.
Në një intervistë për ”A2 CNN”, Bino ngriti shqetësimin se qytetarët po e neglizhojnë mbajtjen e maskës.
Ajo tha se kjo është e pafalshme, pasi udhëzimi i fundit nga Qendra për Kontrollin dhe Parandalimin e Sëmundjeve në SHBA thotë që virusi qëndron në ajër dhe mund të përhapet në 1.5 metër largësi.
Silva Bino: ”Duhet të presim të paktën dy periudha inkubacioni, pra 2 herë, 2 javë, në mënyrë që të themi me saktësi impaktin që do të kenë zgjedhjet në përhapjen e virusit në një shkallë më të gjerë. Por për momentin kemi një situatë të pëlqyeshme, ku jo vetëm kemi shifra të ulta por edhe pozitivitet të ulët, poshtë 5%”, që tregon për një qarkullim jo të dendur të virusit në popullatë.
I dedikohet vaksinimit, pasi vaksinimi ka një impakt mjaft të madh në shtrimet në spitale, format e rënda dhe vdekjet. Vë re që ka një shkrehje të popullatës në lidhje me mbajtjen e maskave, as në mjediset e mbyllura. Kjo është e pafalshme, pasi mund të na çojë në një situatë më të agravuar, aq më tepër që kemi të provuar edhe me një ndryshim të udhëzimit nga Qendra për Kontrollin dhe Parandalimin e Sëmundjeve të SHBA që virusi qëndron në ajër dhe përhapet edhe në 1.5 metër largësi.”
