Ministrja e Mbrojtjes, Olta Xhaçka mori fjalën e saj në Parlament për të folur për projekt-ligjin për Mbrojtjen Civile, teksa u shpreh se me anë të këtij ligji po ndodh një transformim i madh.
Xhaçka u shpreh se Raporti i Riskut Botëror më 2016, e vë Shqipërinë në vend të parë si më i rrezikuari në Evropë nga fatkeqësitë natyrore, teksa përmend edhe raste të ndryshme të ndërhyrjes urgjente.
“Po ndodh një transformim i madh. Ne kemi një projekt-ligj për Mbrojtjen Civile. Kemi përballuar zjarre, tërmete dhe të tjera fatkeqësi, nga veriu në jug. Ka pasur rritje të kapaciteteve falë edhe bashkëpunimit ndërkombëtar.
Shqipëria është një vend ku ka fatkeqësi natyrore. Vendi ynë ndër 10 vendet e para në botë sa i takon riskut të fatkeqësive. Raporti i Riskut Botëror më 2016 thotë se Shqipëria është vendi i parë më i rrezikuar në Evropë dhe i 40-i në botë. Gjatë tranzicionit ka ndodhur një katrahurë, ka pasur ndërtime kuturu, kanë rënë zjarre nëpër pyje. Kur bëhet fjalë për fatkeqësi, Shqipëria i ngjan një pacienti që do të mbrohet me çdo kusht”, deklaroi Xhaçka.
