Kryeministri i vendit, Edi Rama, gjatë fjalës së tij në Parlament u shpreh se nuk do të tërhiqet nga pr.ligji kundër shpifjes për mediat.
Rama shprehet se nuk mund të vazhdojë situata që të shpifet dhe të sajohen të pavërteta ndaj politikanëve, teksa tha se mediat po i futen nëpër shtëpia.
Më tej, theksoi se ka punuar me OSBE-në për projektligjin e ri, ndaj ai zotohet se do të shtrëngohet rrethi i atyre që sipas Ramës e kanë kthyer botën mediatike në një llum.
“Do vijmë shpejt me ligjin kundër shpifjes. Nuk vazhdojmë dot të jemi mish për top i kujtdo që i teket të shpifë të sajojë të na futet nëpër shtëpia e të sakatojë të madh e të vogël në emër të lirisë, këtu do të vijmë kemi premtuar kemi punuar me OSBE, me një draft dhe do kërkojmë të shtrëngohet qartë në ligj rrethi i atyre që e kanë kthyer botën mediatike në llum dhe e bëjnë të pamundur për njerëzit se kush informon e kush sajon, kush i shërben publikun dhe kush i thith gjakun një opinioni të tërë publik”, tha Rama.
