Kryeministri Rama paralajmëroi sot në Kuvend, se nëse nuk do ishin marrë masat e menjëhershme, në Shqipëri do të kishim 18 mijë të vdekur. Me ironi, ai iu drejtua të gjithë kritikëve, ku sipas tij, e kanë luksin që të shesin dëngla në këtë situatë pandemie që ndodhemi.
Duke iu referuar projeksioneve të qeverisë, nëse masat e ndërmarra nuk do ishin respektuar, përflitej për 2800 të vdekur. Duke e krahasuar Shqipërinë me vendet e tjera, kreu i qeverisë tha se deri më tani, ia kemi dalë me këtë situatë kritike. Po kështu, Rama ka premtuar se sikundër po fitojmë betejën me koronavirusin, do e fitojmë edhe me ekonominë.
“Është normale që sot pas kësaj periudhe kaq dramatike për të gjithë, përderisa nuk numërojmë dhjetëra të vdekur në ditë, dhe përderisa hyjmë në grupin e vendeve që bazuar në fakte e shifra, e kemi përballur më me efikasitet këtë luftë. Të dëgjosh lloj-lloj dënglash.
Dëngla që faktikisht janë të mirëkuptueshme kur vijnë nga njerëz të zakonshëm, të cilët duke mos e përjetuar tragjedinë përveçse përmes ekraneve të televizorit, përjetojnë stresin, ankthin dhe dëmin mbi ekonominë e tyre familjare.
Është jo normale që dënglat t’i dëgjosh nga njerëz që kanë mikrofon, dhe zëri i tyre shkon tek një njeri i zakonshëm. Që prezumohet që të jetë një zë që flet në emër të disave.
Projeksionet flisnin për mundësinë potenciale, që nëse s’do të ishte marrë asnjë masë, mund të kishim 18 mijë të vdekur. Ndërsa projeksionet tona, sikur masat të mos ishin respektuar e imponuar flisnin për 2800 të vdekur.
Ky është fakt, qeveritë vlerësohen për atë që ndalojnë të ndodhë. Nuk ka asnjë argument apo arsye mbi baza logjike që hedh poshte faktin që sot Shqipëria ia ka dalë, të përballojë fazën e parë me këtë armik të padukshëm”.
