Dukej se kuqezinjtë do të vinin në grumbullimin e radhës në një formë fantastike, pasi të gjithë po shkëlqenin në klubet e tyre. Por i pafat ka qenë Sokol Cikalleshi, i cili është dëmtuar. Sulmuesi i Kombëtares, nuk ishte as në listën e të grumbulluarve të ekipit te tij Akhisarspor i cili u përball me Alaniasporin.
Ditën e sotme, vet klubi turk ka njoftuar se Cikalleshi do të qëndrojë larg fushave të blerta tre javë, pas një dëmtimi që ka pasur në këmbë.
Ai po kalonte një formë shumë të mirë, javët e fundit dhe pritej të grumbullohej nga Panuçi për ndeshjet e Kombëtares këtë muaj.
Një mundësi zgjedhje më pak për teknikun italian, i cili do të kërkojë diku tjetër për të plotësuar skuadrën në repartin ofensiv.
