Ish-sekretari i PD-së, Arben Ristani është paraqitur sot në Prokurori lidhur me lobimin e kësaj partie në SHBA.
Pasi paraqitjes, ai ka folur për mediat, teksa tha se Prokuroria nuk ka asnjë provë që mund ta implikojë atë në këtë çështje. Më tej, Ristani u shpreh se ky është një proces i iniciuar politikisht dhe se ka për qëllim që të bëjë pis Partinë Demokratike.
Ish-deputeti tha se organi i akuzës nuk i ka paraqitur atij asnjë provë që të implikojnë Ristanin në transaksionet financiare në lidhje me lobimin e Partisë Demokratike në Shtetet e Bashkuara të Amerikës.
“Qeverisë kriminale po i vjen fundi. Dhashë deklaratën time, unë si Arben Ristani nuk kam asnjë lidhje me këtë histori. Akuza është e iniciuar nga ana politike. Nuk ka prova. S’ka asnjë dokument. Tani kjo nuk ka rendësi, pasi ju jeni për thelbin e çështjes. U paraqita mbi bazën e ftesës së prokurorisë. U kërkova prova, por ju siguroj se nuk ka asnjë provë që sekretari ka nxjerrë vendime me firmë. Nuk kam asnjë bisedë telefonike që ka të bëjë me dhënie apo bërje pagesash. Nuk kam asnjë dijeni për marrje apo bërje pagese.
Çështja është e nxitur politikisht, për të bërë pis edhe PD-në. Në këtë godinë të drejtësisë ka akoma njerëz të ndërgjegjshëm, të aftë që mund të vendosin drejtësi në këtë vend. Nuk kam asnjë dokumentacion, asnjë bisedë, brenda dhe jashtë vendit. E gjithë çështja ka qëllim tjetër, e nxitur politikisht. Jam njohur me akuzën. Nuk më njohën me asnjë dokumentacion. Po fluturojnë në ajër dhe janë të motivuar politikisht”, tha Ristani.
