Familjarët e Ardian Çapjes i cili dyshohet të ketë mbetur i plagosur si pasojë e disa të shtënave, e kanë mohuar këtë gjë në deklaratën e tyre për policinë në spital.
Ndërkohë Panorama raporton se vetë Çapja e ka mohuar të jetë qëlluar me armë zjarri. Ai ka deklaruar në spital se ka mbetur i plagosur si pasojë e një incidenti në banesë.
Mësohet se Çapja ka marrë një plumb në shpatull, ndërsa është nisur drejt spitalit të Traumës në kryeqytet për trajtim më të specializuar.
Ngjarja ka ndodhur në lagjen e quajtur “Emin Matraxhiu”. Banorët në zonë kanë raportuar për të shtëna me armë zjarri, ndërsa shumë pranë banesës ku jeton Ardian Çapja ka marrë flakë një mjet që nga të dhënat e policisë mësohet se ka pasur targa false.
