Policia e shtetit njoftoi pak ditë më parë, se parandaloi disa akte të rënda terroriste, që po përgatiteshin të kryheshin në Shqipëri nga disa operativë iranianë, kryesisht kundër Mojahedin-e Khalq, organizatës opozitare iraniane në mërgim, një pjesë e mirë e anëtarëve të së cilës janë vendosur në vendin tonë prej vitit 2012.
Operacionet do të koordinoheshin nga operativi i Forcave Kuds, agjenti Iranian i njohur me pseudonimin Peyman. Po kush janë Kuds? Ajo është një njësi e Gardës Revolucionare të Iranit (IRGC), që ka si mision të zhvillojë luftëra jokonvencionale, dhe aktivitete të inteligjencës jashtë vendit.
Forcat Kuds komandohet nga gjenerali Kasëm Sulejmani. Kjo njësi mbështet aktualisht aktorë jo-shtetërorë në shumë vende, si Hezbollahun në Liban, Hamasin dhe Xhihadin Islamik në Rripin e Gazës dhe Bregun Perëndimor në Palestinë, grupimin etnik Huthi në Jemen, dhe militantët shiitë në Irak, Siri dhe Afganistan.
Nuk dihet me saktësi madhësia e Kuds, por ekspertët flasin për një trupë prej 10.000-20,000 anëtarësh. Kuds raportojnë direkt tek Udhëheqësi Suprem i Iranit, Ajatollah Khamenei. Kjo forcë u krijua gjatë Luftës Iran-Irak në vitet 1980, si një njësi speciale brenda Gardës Revolucionare. Si gjatë ashtu edhe pas luftës, ajo siguroi mbështetje për kurdët që luftonin kundër Sadam Huseinit.
Në vitin 1982, një njësi Kuds u vendos në Liban, ku ndihmoi në themelimin e Hezbollahut, të cilin SHBA dhe vendet perëndimore, e klasifikojnë si një organizatë terroriste. Vitet e fundit, kjo njësi ndihmoi shumë rebelët talibanë kundër administratës së presidentit Hamid Karzai në Afgasnistan, të mbështetur nga NATO.
Ndërkohë ka pasur shumë raporte, se iranianët e kësaj njësie janë angazhuar përkrah myslimanëve boshnjakë në luftën kundër serbëve, gjatë luftërave në ish-Jugosllave. Në vitin 2014, Forca Kuds u vendosën në Irak, për të udhëhequr aksionet iraniane kundër ISIS-it. Ndërkohë vetë Garda Revolucionare Islamike, është një degë e Forcave të Armatosura iraniane. Ajo u themelua pas revolucionit iranian më 22 prill 1979, me urdhër të vetë Ajatollah Ruhollah Khomeinit.
Sipas kushtetutës, ndërsa ushtria mbron kufijtë dhe ruan rendin e brendshëm, Garda Revolucionare (Pasdaran në gjuhën vendase), synon të mbrojë sistemin politik të republikës islamike të vendit. Vetë Rojet Revolucionare, thonë se roli i tyre në mbrojtjen e sistemit islamik, është parandalimi i ndërhyrjes së huaj, grushtet e shtetit nga ushtria apo “lëvizjet devijuese”. Garda ka një personal prej 125.000 trupash, përfshirë forcat tokësore, ajrore dhe detare. Forcat e saj detare, merren me kontrollin e ujërave territoriale në Gjirit Persik. Garda kontrollon ndërkohë edhe milicinë paramilitare Basij, që ka një personal prej rreth 90.000 njerëzish.
Por përtej misionit ushtarak, Garda Revolucionare ka marrë një rol më të madh në gati çdo aspekt të shoqërisë iraniane. Ajo është angazhuar në shtypjen e përgjakshme të protestave qytetare, gjatë dhe pas zgjedhjeve presidenciale të vitit 2009.
Kreu i Gardës Revolucionare, është që nga ky vit Hosein Salami. Garda cilësohet si një organizatë terroriste nga qeveritë e Bahreinit, Arabisë Saudite dhe Shteteve të Bashkuara. Garda ka përveç Kuds, edhe një njësi të quajtur Forca Speciale e Marinës Sepah (SNSF).
Ndërkohë Trupat Ansar-ul-Mehdi (Pasuesit e Imam Mahdi), janë kryesisht përgjegjëse për mbrojtjen e zyrtarëve të lartë të qeverisë dhe parlamentit.
Si një grupim elitar, anëtarët e Gardës Revolucionare, kanë një ndikim në botën politike të Iranit. Ish-presidenti iranian Mahmud Ahmadinexhad iu bashkua Gardës në vitin 1985. Pjesa më e madhe e kabinetit të tij përbëhej nga veteranë të IRGC. Shumë pjesëtarë apo ish-pjesëtarë, janë emëruar ambasadorë, kryetarë bashkie dhe guvernatorë rajonalë.
Për pasojë, Garda Revolucionare ka një perandori biznesi miliarda dollarësh, që shtrihet gati në gjithë sektorët ekonomikë. E përditshmja amerikane “Los Angeles Times”, vlerëson se Garda Revolucionare ka lidhje me mbi 100 kompani në vend, dhe të ardhurat e saj vjetore janë mbi 12 miliardë dollarë.
IRGC ka gjithashtu ndikim mbi fondacione të shumta bamirëse joqeveritare, dhe që kontrollohen nga klerikët kryesorë në vend. Që nga 15 prilli i këtij 2019, Shtetet e Bashkuara e kanë klasifikuar IRGC si një organizatë terroriste. Pavarësisht shumë kritikave që ka marrë për shkak të mbështetjes së grupimeve terroriste, vetë IRGC nuk është shpallur asnjëherë si një organizatë terroriste nga Kombet e Bashkuara. Edhe pse Këshilli i Sigurimit i ngriu disa vite më parë asetet e saj jashtë vendit, vendimi u shfuqizua në vitin 2016./ TIRANA TODAY
