Policia ka vënë në pranga shtetasin Zamir Sijani, 43 vjeç, i cili plagosi rëndë në kokë babë e bir, Ymer dhe Erjon Çela. Ngjarja ndodhi në protestën e opozitës së bashkuar që u mbajt të dielën, në kohën kur ata protestonin pranë Kuvendit.
Mësohet se Sijani, banues në Xhafzotaj ka qenë dënuar më parë për trafik droge. Lidhur me rastin në fjalë, ish-kryeministri Berisha nxori pamjet e personave të plagosur rëndë nga spitali, duke akuzuar policinë për dhunë ndaj protestuesve.
Më tej, dolën pamjet nga ministri Lleshaj, ku dukej qartë se atë e bir ishin dhunuar nga protestues dhe jo nga policët.
Njoftimi i plotë i Policisë së Shtetit:
Tiranë
Kapet dhe ndalohet një prej autorëve të “Plagosjes së rëndë me dashje”, të dy shtetasve mbrëmjen e datës 2 Qershor në bulevardin “Dëshmorët e Kombit”
Në vijim të kqyrjes së pamjeve filmike, si dhe informacioneve të marra në rrugë operative u bë kapja dhe ndalimi me inisiativë i shtetasit :
Z. S, 43 vjeç, banues në fshatin Xhafzotaj Durrës, (i dënuar më parë për veprat penale “Trafikimi i lëndëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit”).
Ndalimi i tij u bë pasi më datë 02.06.2019, rreth orës 20:00, në Bulevardin “Dëshmorët e Kombit“ dhe në rrugën “George W Bush”, ka prishur qetësinë publike në kohën që subjekti politik Partia Demokratike dhe aleatët zhvillonin protestën dhe ka goditur me mjete të forta shtetasit, Y. Ç dhe E. Ç (babë e bir) banues në Tiranë, duke ju shkaktuar dëmtime të rënda në pjesën e kokës.
Materialet i kaluan Prokurorisë për veprime të mëtejshme për veprat penale “Plagosje e rëndë me dashje” dhe “Prishja e qetësisë publike”.
