Ish-kandidati për kreun e Partisë Socialiste në Durrës, Ardit Kërtusha, është plagosur me armë zjarri mesditën e sotme.
Ngjarja ka ndodhur në një lokal në zonën e plazhit në Durrës, i cili është në pronësi të reperit Rigels Rajku, i njohur me emrin e artit Noizy. Nga ana e uniformave blu vijon krehja e zonës, për identifikimin dhe kapjen e autorit.
Sipas uniformave blu, ky rast ka ndodhur pas një konflikti të çastit, ndërkohë që pas plagosjes Kërtusha është dërguar në spitalin e Traumës në Tiranë.
Kush është Ardit Kërtusha
Ardit Kërtusha kandidoi për kryetar të PS-së në Durrës në 2020, dhe më pas u tërhoq nga gara. Para zgjedhjeve të 25 prillit, Kërtusha iu bashkua Partisë Demokratike dhe zhvilloi takime me Lulzim Bashën. Ish-kryetari i FRESSH për qytetin e Durrësit, u shpreh asaj kohe se qyteti ishte peng i interesave të Dakos. Basha u tregua entuziast për faktin që ka socialistë që duan ndryshim, dhe e gjejnë ndryshimin tek Partia Demokratike.
Njoftimi i policisë
Rreth orës 13:00, në lagjen nr.1 Durrës, dyshohet se gjatë një konflikti të çastit, për motive të dobëta, është plagosur me armë zjarri, në këmbë, shtetasi A. K., 31 vjeç, i cili ndodhet nën kujdesin e mjekëve, jashtë rrezikut për jetën. Vijon krehja e zonës, për identifikimin dhe kapjen e autorit. Grupi hetimor ndodhet në vendngjarje, dhe po punon për sqarimin e plotë të rrethanave të ngjarjes.
