Grupi hetimor ka rindërtuar pistat e hetimit për vrasjen e 27-vjeçarit Aleksandër Sadikaj, më 11 qershor në zonën pranë Saukut. E para është prishja e pazareve të drogës, pista e dytë ku po hetohet është ajo e konflikteve të mundshme që mund të kishte kohët e fundit i riu. E treta është ajo e dhënies së parave me fajde dhe e katërta ajo e borxheve.
Grupi hetimor po verifikon aparatet celular që ka pasur në përdorim Aleksandër Sadikaj, i ekzekutuar me tritol. Burimet bëjnë me dije se në bashkëpunim me kompanitë telefonike, po kontrollohen detaje të bisedave apo komunikimeve të dyshimta që mund të ketë pasur së fundmi viktima. Në fokus janë edhe qelizat telefonike, përmes të cilave po mundohen të kuptohen lëvizjet që ka kryer së fundmi 27-vjeçari. Po ashtu në fokus të qelizave telefonike, në zonën ku ka ndodhur ngjarja janë edhe aparate të tjerë celular që mund të kenë lidhje me autorët.
Aleksandër Sadikaj jetonte në zonën e Saukut me një vajzë, me të cilën mësohet se ishte në lidhje prej kohësh. Kjo e fundit së bashku me familjarë të viktimës janë marrë në pyetje, por dëshmia e tyre nuk ka ndihmuar hetimin. Ajo ka thënë se nuk ka pasur dijeni për konflikte të viktimës.
