Kompania farmaceutike amerikane Pfizer ka thënë se ka identifikuar versione të rreme të vaksinës së saj kundër koronavirusit, në Meksikë dhe Poloni.
Dozat janë konfiskuar nga autoritetet në të dyja shtetet dhe është konfirmuar përmes testeve se janë të rreme.
“Ne jemi të vetëdijshëm që në këtë lloj mjedisi të nxitur nga lehtësia dhe komoditeti i tregtisë elektronike dhe anonimati i ofruar nga interneti, do të ketë një rritje të prevalencës së mashtrimit, falsifikimit dhe veprimtarisë tjetër të paligjshme pasi lidhet me vaksinat dhe trajtimet për COVID-19. “-u tha në një deklaratë nga Pfizer.
Në Meksikë, ato kanë qenë me ambalazhe false, derisa në Poloni besohet se substanca në vaksina ka qenë për trajtim të rrudhave. Rreth 30 njerëz kishin marrë këtë vaksinë në Meksikë e cila kushtonte rreth 1.000 dollar për dozë.
Organizata Botërore e Shëndetësisë ka paralajmëruar se vaksinat e rreme “përbëjnë rrezik serioz në shëndetin publik global”. Ajo ka bërë thirrje për identifikim të këtyre vaksinave dhe largim nga tregu.
