Vijon në Tiranë aksioni për parandalimin e aksidenteve. Policia Rrugore ka njoftuar se ata janë vendosur në aksin Fushë-Krujë – Kamëz, ku paralajmërojnë kontrolle të shumta në zona të ndryshme përgjatë orëve të caktuara të ditës.
“Është e papranueshme dhe e pafalshme të ecet me 101 km/orë në një zonë të banuar”, sqaron policia. Kjo e fundit ka bërë të ditur se në aksionin e ditës së sotme në hyrje të Kamzës janë pezulluar 62 leje drejtimi.
Specialisti për Sigurinë dhe Qarkullim rrugor në Komisariatin e Policisë Rrugore, nënkomisar Blerim Gjini, u bën apel drejtueseve të automjeteve për të respektuar rregullat e qarkullimit rrugor.
“Sot jemi në aksion rrugor Fushë-Krujë – Kamëz. Në hyrje të Kamzës, gjatë ditës së sotme janë ndëshkuar rreth 62 drejtues mjetesh për shkelje e tejkalimit të normave të shpejtësisë më shumë se 20 km/orë nga e lejuara. Kontrolle të tilla do vazhdojnë edhe në segmente të tjera, edhe në rrugë dytësore. Për shkak të aksidenteve, mjet me këmbësor, mjet me mjet, në kuadër të parandalimit, kontrolle të tilla do vazhdojnë gjatë gjithë orareve të ditës. U bëj apel drejtuesve të respektojnë çdo normë të kodit rrugor,” u shpreh Gjini.
