Zëvendësministri i Mbrojtjes, Petro Koçi, thotë se në konferencën për mediat, presidenti Ilir Meta u shfaq i frikësuar, dhe këtë sipas tij, e tregoi edhe ngritja e zërit. Madje, Petro Koçit, presidenti Meta i është dukur si i menderosur, duke reflektuar panikun që e kishte kapluar. Sipas tij, Meta e lexoi komunikatën sikur të ishte në një miting. E kjo mund të ishte shmangur lehtësisht, nëse edhe mund t’ia linte që ta lexonte zëdhënësi i tij, Tedi Blushi.
“Mua presidenti mu duk i menderosur, një situatë frike që është munduar ta kalojë me ngritje zëri. Ishte leximi i një komunikate në një miting. Ajo ishte një komunikatë për shtyp, që mund ta lexonte edhe zëdhënësi i presidentit. Është në një pozitë shumë të vështirë. Skema me Muçin i dështoi. Ky që ne shohim këtu është Ilir Meta i vërtetë”, tha Petro Koçi në “Report Tv”.
Me tone të ngritura, presidenti Ilir Meta u bëri thirrje shqiptarëve që të mbrojnë Kushtetutën, dhe premtoi se do të bëjë gjithçka për të bërë Referendum në mbrojtje të saj. Në konferencën e jashtëzakonshme për shtyp, kreu i shtetit u shpreh se Kushtetuta është vija e kuqe që nuk duhet të kalohet, ndërsa i bëri apel popullit që t’i thotë ndal degradimit të vendit.
