Juristja Eni Çobani, në janar të këtij viti, bashkë me mikeshën e saj, ministren për Dialog të Kosovës, Edita Tahiri pësuan një aksident, ku makina me të cilën udhëtonin ra nga një lartësi prej 24 metrash.
E ftuar pasditen e sotme në emisionin ‘Rudina’ , Çobani për herë të parë ka rrëfyer një detaj mjaft prekës.
Teksa po rrokullisej me makinë, Eni mban mend që i ka thënë mikeshës së saj vetëm tri fjalë: “Edita, më fal!”
Këto fjalë janë fiksuar në mendjen e Editës e cila i ka rrëfyer Enit se aksidentin e ka harruar, por fjalët që ajo i ka thënë, jo.
“Nga trauma e madhe që pësova nga aksidenti, as sot nuk e mbaj mend vendin ku kam bërë aksident. Më ofruan që ta shikoja vendin kur u ktheva, por nuk pata fuqi. I kam premtuar vetes që do shkoj sepse Tropoja është vendlindja ime e dytë, të parën kam Tiranën dhe të dytën Tropojën. Kaq e fortë ka qenë ngjarja. Aksidenti asnjëherë nuk bëhet për motive që do të bësh aksident, ai ndodh. Por sigurisht ka një shkak. Moti ishte i vështirë, rruga kishte ngrirë dhe kishte akull. Përgatitja jonë nuk është aq e plotë për rrugë të tilla dhe kjo bëri që unë të ecja shumë ngadalë atë natë, për më tepër që kisha në makinë një të afërme timen, Edita Tahirin.
‘Unë mbaj mend çdo gjë. Kam qenë me shpejtësi të ulët. Në momentin që ne u afruam tek kthesa e Xhanës, një kthesë e rrezikshme që kush ka rënë nuk ka dalë më gjallë, por në momentin që ne kemi rënë kemi qenë në koshiencë të plotë. Kanë qenë sekonda, por kur pashë që frenat nuk punonin, i thashë Editës: “Diçka po ndodh”. Makina nuk e mori kthesën dhe ne shkuam drejt në humnerë. Kur u përplasëm me karrexhatën, në atë moment menduam se çdo gjë mori fund dhe e vetmja fjalë që i kam thënë Editës ka qenë “më fal”. Nuk doja që takimi jonë të përfundonte në këtë formë. Disa ditë pasi e kam takuar më ka thënë: “Aksidentin e kam harruar, por nuk më hiqet nga mendja fjala jote”, tha Çobani.
