Qyteti i Klosit është tronditur mesditën e sotme nga të shtënat me armë, pasi një 17-vjeçar është vrarë, ndërsa dy të tjërë kanë mbetur të plagosur, mes të cilëve edhe babai i viktimës. Konflikti ka ndodhur mes dy fiseve, Mjeshtri dhe Hasula, një konflikt ky që thuhet se ka qenë i vazhdueshëm. Viktima është identifikuar si Danjel Hasula.
Autor i ngjarjes dyshohet se është Besnik Mjeshtri, i cili është shpallur në kërkim nga policia. Identifikimi i autorit është bërë pas marrjes së dëshmive të banorëve, që kanë parë përplasjen me armë.
Të plagosurit janë nisur drejt spitalit të Burrelit, ndërsa thuhet se babai i viktimës është në gjendje të rëndë.
Masakra ka ndodhur në mes të qytetit, në afërsi të një lokali. Policia dhe ambulanca kanë mbërritur me vonesë në vendngjarje.
