Dje është thelluar edhe më shumë “lufta” mes ambasadores amerikane Yuri Kim dhe grupimit antiamerikan të “Foltores” të udhëhequr nga ish-kryeministri Sali Berisha. Ky i fundit e quan të kryer faktin se ka marrë në dorë Partinë Demokratike. Duket se të njëjtën qëndrim nuk mban SHBA-ja, të cilat dje i kanë dhënë Berishës një “goditje” të fortë.
SHBA konfirmon Alibeajn si pasardhës të Bashës
Ambasadorja amerikane Yuri Kim, një ditë më parë u takua me kreun e grupit parlamentar të Partisë Demokratike, Enkelejd Alibeaj. Këtë të fundit e ka cilësuar si kryetari në detyrë i PD, duke mos njohur kështu Komisionin e Rithemelimit si drejtues të Partisë Demokratike. Në një postim në “Twitter”, vetëm pak minuta pas takimit, diplomatja amerikane ka theksuar se Shtetet e Bashkuara të Amerikës dhe Shqipëria duhet të shohin para e jo mbrapa, duke thumbuar Berishën, të cilin e ka etiketuar si të shkuar.
“Diskutim shumë i mirë sot me Enkelejd Alibeajn, kryetarin në detyrë të Partisë Demokratike. Folëm për një gamë të gjerë çështjesh. SHBA ka pasur një marrëdhënie të fortë, të veçantë me PD që në lindjen e saj. Ne e vlerësojmë këtë marrëdhënie dhe rolin e domosdoshëm të PD-së për Shqipërinë dhe shpresojmë që të forcohet. SHBA dhe Shqipëria kemi shumë punë përpara për ta mbajtur Shqipërinë në rrugën e anëtarësimit në BE, demokracisë, ndërtimit e bashkëpunimit në mbrojtje dhe zgjerimin e mundësive të biznesit dhe ekonomik për të gjithë. Le të vazhdojmë së bashku përpara, jo mbrapa!”, shkruan Kim pas takimit me Alibeajn.
Yuri Kim: Të refuzojmë gjuhën e urrejtjes
Ambasadorja e SHBA-së në Tiranë, Yuri Kim, është takuar dje edhe me disa të rinj në Tiranë gjatë një konferencë, për promovimin e një shkolle si qendër komunitare. Diplomatja amerikane theksoi se në internet apo dhe në mesazhet që ndonjëherë përcjellë politika, lexohet gjuha e urrejtjes. Kim, duke ju drejtuar të rinjve u shpreh se ato duhet të refuzojnë që të mbajnë urrejtjen brenda vetes së tyre, pasi është e dëmshme, ndërsa shtoi se ato duhet të punojnë në ekip, nëse nuk mund që të ecin para të vetëm.
“Respektojeni veten, të tjerët! Respektoni jo për shkak të ndonjë faktori tjetër, por për shumë arsye. Qoftë nëse e lexojmë në internet dhe në politikë, dëgjojmë ndonjëherë mesazhe urrejtje. Ata duan që ju të urreni dikë tjetër për shkak se janë më të pasur se ju apo vjen nga një pjesë tjetër e vendit, apo komb tjetër. Duke mbajtur urrejtje brenda vetes suaj, është e dëmshme për ju, do të shkatërronte vetëvlerësimin tuaj. Për këtë arsye refuzoni ata që urrejnë dhe ata që mbartin mesazhin e urrejtjes. Por edhe mbusheni me ambicie për veten, se jeni më të mirë se kaq”, ka deklaruar ambasadorja Kim.
