Kreu i Grupit Parlamentar të PS-së, Taulant Balla ka marrë fjalën në seancat e sotme në Kuvend menjëherë pasi foli kreu i PD-së Lulzim Basha.
Kreu i PD-së u shpreh se e Shqipëria mori lajmin më të keq, pasi partitë gjermane nuk do të votojnë pro hapjes së negociatave.
“Edi Rama ka ardhur sot këtu të bëjë të paditurin, të fshehë të vërtetën përmes mediave të kapura për gryke, me favore joshje dhe shantazhe.
Mbrëmë vetëm 24 orë pas samitit franko-gjerman dhe takimit Merkel Makron, CDU/CSU aleatët tanë dhe social demokratët gjermanë kanë rakorduar qëndrimi e tyre sa i përket hapjes apo jo të negociatave më Shqipërinë.
Ashtu si Edi Rama e di fare mirë se lajmi nga ky rakordim është më i keqi që shqiptarët mund të prisnin. Është një lajm që Shqipëria nuk e meriton po është vendimi gjerman, tashmë Jo, i qeverisë gjermane. Shqipërisë nuk i hapen negociatat”, -tha Basha.
Ndërsa më tej Basha tha se opozita ka ndikuar pozitivisht, e në atë moment në sallë pati të qeshura, mes tyre edhe kryeministri Rama e kreu i grupit Parlamentar të PS-së Taulant Balla.
Duke iu drejtuar këtij të fundit ulur në vendin e tij, Basha bëri një akuzë të fortë kur tha se Balla ka qenë edhe para tre ditësh në Gjermani, e ka marrë një makinë “Toyota Yaris” me 1,5 milionë euro të drogës brenda.
Por në përgjigje të tij ka reaguar Balla i cili është shprehur se: “Në fakt e vërteta e madhe është se Gjermania po e ndjek me vëmendje hapjen e negociatave për Shqipërinë. Të kesh për kryetar Lulin është sikundër të kesh për kryetar Babalen. Luli dhe Babalja janë njësoj. Babales i doli lëngu dhe lëngun Lul nuk ke vend ku ta fusësh më. Faleminderit dhe të fala Babales”.
