Tensioni mes banorëve dhe policisë ka filluar që në orët e para të mëngjesit. Banorëve të Bulevardit të Ri i janë bashkuar edhe banorët e Astirit për të kundërshtuar projektin e Bashkisë së Tiranës. Forcat e policisë i kanë dalë përpara protestuesve të Astirit për të mos lejuar që ata t’i bashkohen banorëve të Bregut të Lumit, të cilët u përleshen me Policinë për të ndalur shembjen e shtëpive.
Disa nga qytetarët u vendosën përpara fadromave, kryesisht gra dhe fëmijë, kurse të tjerë kanë hipur mbi çatitë e shtëpive duke pritur që policët të largohen.
Nuk do të lejojmë që banesat tona të prishen pa u dëmshpërblyer, janë shprehur ata. Me thirrjet “Rama ik, Rama ik” dhe “Shtëpitë tona do t’i mbrojmë me gjak”, banorët e Bregut të Lumit vazhdojnë protestën prej disa orësh.
Në mbështetje të protestuesve, ishte edhe ish-deputeti i PD-së, Klevis Balliu, i cili u shpreh se policia i ka dhunuar qytetarët.
Një nga banorët e Bregut të Lumit, i moshuar, i është drejtuar policisë me një gjuhë të qetë duke shpjeguar se nuk duhet të sillen në këtë mënyrë me ata.
“Nuk jemi kundër prishjes, por duam që të punohet me standarde”, shprehet qytetari.
“O njeri nuk jam për parti këtu, as për Partinë Demokratike, as për Partinë Socialiste, as për LSI! Jam për shtëpinë time këtu, jam për shtëpinë time! Po prishni shtëpinë e fukarait. Dorëzojeni kapelën”, i drejtohet policisë i moshuari.
