Avokatja e Popullit, Erinda Ballanca ka folur në lidhje me padinë që ajo ka bërë ndaj Këshilli të Emërimeve në Drejtësi.
E ftuar në emisionin “Përballë” në RTSH, Ballanca shpjegoi se në denoncimin e saj kërkon shfuqizimin e disa neneve të rregullores së këtij institucioni. Sipas saj, nenet në fjalë kufizojnë kompetencat ligjore të institucionit që ajo drejton.
“Nuk mund t’i hiqet Avokatit të Popullit një kompetencë që ia ka dhënë Kushtetuta me një rregullore”, tha Ballanca.
Ajo komentoi edhe përplasjen mes Dvoranit dhe presidentit Meta, teksa shprehet se veprimet e kreut të KED-së kanë kufizuar mundësinë e kreut të shtetit për të zgjedhur anëtarë të Gjykatës Kushtetuese.
“Këshilli me këto dërgesat në mënyrë të menjëhershme dhe kohë të ndryshme ia kufizoi edhe më tej mundësinë e zgjedhjes midis këtyre anëtarëve që ne kishim”, tha ajo.
Ballanca foli edhe rreth procedurave të nisura nga Parlamenti për shkarkimin e Metës, duke thënë se ai nuk ka kryer shkelje.
“Pavarësisht se në gjykimin tim kompetencat e Presidentit ishin interpretuar në një mënyrë të zgjeruar, ajo nuk përbën një shkelje të rëndë. Në mjaft raste edhe Kuvendi ka përdorur të njëjtën praktikë. Ka bërë edhe ç’emërime të personave që i ka emëruar Kuvendi, duke e marrë të mirëqenë që institucioni që ka të drejtën e emërimit, ka edhe të drejtën e ç’emërimit”, tha ajo.
